Владимир Ромашкин седицянть 70 иень топодемазо

Geographylogo.png Лия кельтнесэ: русский • эрзянь

ожоковонь 1це чись, 2021
2021 иень таштамковонь 6 чистэ — 2021 иень таштамковонь 11 чис Мордовиясо ютасть эрьва-кодат пурнавкс, конатне алтазельть Владимир Иванович Ромашкинэнь 70-иень топодеманень (эрз. Йовлань Оло). Сон содавикс аволь ансяк эсь республикасо, омбомасторсо ды лия финнэнь-угрань республикатнесэяк.

Ромашкин кепедизе фольклоронь марто важодеманть од таркас, сон невтсь, ков эряви куземс мельга молицятненень, саемга Ойме ды Мерема морамо кужотненень. Сон аволь ансяк пурнась эрзянь ды мокшонь морот, сон артнесь ды морсесь эйсэст эрьва кодамо республикава ды масторга. Сон ульнесь этномузыкологокс, фольклоронь содыдеекс, эсь морамо кужонь «Торамань» пурныцякс, тонавтыцякс.

Неень шканеяк тензэ алтавить эрьва-кодат культурань коряс теевемат, выставкат. Сонзэ лемсэ лемдязь эрзянь Этно-кудось. Истя Вирь ало Тавласо сонзэ юбилеезэ тешкстазь «Вейсэнь ундокст» чувтова керсицянь фестивальсэ, «Тюштянь налксемат» эрзянь коень коряс налксемасо, «Торамась терди» кезэрень эрзянь моронь фестивальсэ, Этно-кудова (эрз. Йовлань Олонь лемсэ «Этно-кудо») ветить экскурсият. Владимир Иванович рамизе те кудонть эсь шкава, а ней сон велявтовсь эрзянь культурань кудокс, конась кандтни Владимир Ивановичень лемензэ.


2021 иень таштамковонь 10 чистэ А. С. Пушкин лемсэ ловномакудосо,Саран ошсо ютась кортамонь мероприятия, конась алтазель Владимир Иванович Ромашкин седицянтень — «Вклад В. И. Ромашкина в финно-угорскую культуру» («Жизненный путь и творческое наследие В. И. Ромашкина»). Мероприятиянть мельга ютавтовсь концерт, конасонть лиснесть морамо эрьва-кодат морамокурот.

Саран ошонь Воронинэнь лемсэ краеведениянь музейсэ панжозель выставка, конась истя жо алтазель Владимир Ивановичень тевензэ-шкинеманзо туртов.


Чачома чинтень анокстави Владимир Иванович ланга книга.

Владимир чачсь Ицялсо, тетязо-авазо — тонавтыцят. Тетязо кадызе шумбрачинзэ ойнасо, секскак кулось шкадо икеле. Авазо пурнась школасо хор, косо эсь эйкакшонзояк морасть. Секе шкане Ицялонь школасо важодсь Василий Кузьмич Радаев, фольклоронь пурныцясь. Паряк сон ды Владимирэнь авазо ульнесть не ломанекс, конат невтизь кинть, кува Владимир мольсь эрямонзо перть.

Морамо курось, конань пурнызе Владимир эри нейдяк. Ансяк эрямокизэ а шожда: сон явовсь кавтов. Вейкесэнть моры Владимирэнь цёразо. Тона иестэ прядовсь суд, кона кемекстызе сень, кие карми «Торама» лементь алкуксонь кирдицякс. Истя эли лиякс, ансяк Владимир Ивановичень тевесь эри ды айги икелев.


СсылкиПравить

ИсточникиПравить

Оригинальный репортаж
Эту статью написала Vaija специально для Русских Викиновостей. Она содержит ранее не публиковавшиеся материалы или исследования, источником которых является сам автор. Вы можете свободно без согласования и выплаты вознаграждения копировать, распространять и изменять эту статью в любых целях, включая коммерческие, однако вы обязаны указать автора, источник и лицензию. Например, так: Vaija; Викиновости; CC BY 2.5. Вы также должны обозначить изменения, если таковые были сделаны. Лицензии изображений уточняйте на их страницах на Викискладе.

Комментарии

Викиновости и Wikimedia Foundation не несут ответственности за любые материалы и точки зрения, находящиеся на странице и в разделе комментариев.