Людмила Рябовань лись валморонь од пусмозо

Лия кельтнесэ: русский • эрзянь

27 октября 2017 года

Эрзянь валморозеенть Людмила Рябовань валморонь «Кие тон?» од пусмонть невтемась. Саран ош, «А. С. Пушкинэнь лемсэ Раськень библиотекась», 2017 иень ожоковонь 25 чи.

Кода минь икеле сёрмадыне, 2017 иень ожоковонь 25 чистэ Саран ошсо литературань «Вал» курось ютавтсь Людмила Рябовань шкинеманстэнь алтазь чокшне. Покш казекс весень туртов кармась валморозеенть од валморонь пусмонь лисемась.

Истямо чокшнесь а стувтови. Сон сетнень ютксто, конатнень ламо иень ютазьгак, паряк натой сыредезь-маштозь, кармат ледстнеме кода сехте валдотнень. Минь одт, виевть. Минь – «ВАЛ». Течи покш кенярксонок: Людмила Рябовань лиссь валморонь од пусмозо. «Кие тон?» – истямо лем путсь тензэ сёрмадыцясь, истямо кевкстема макссь эрьвантень эйстэнек. Каршо валонть муемга эряви кувать карамс прясонть-оймесэнть, онкстнемс, арсемс, максомс эстеть питне. Нурькинестэ – важодемс.

Людмила Рябовань шкинемань чокшненть анокстамсто ризнынек: лиси-арась пусмось эрявикс шкантень? Вадрясто-аволь ловновить тенек валморотне? Сыть-а сыть тердезтне? Ды каня аламо ризнэмат-мелявкст эрсить покшчинь анокстамсто… Ансяк, койсэнь, весемесь ютась пек парсте. Пусмодонть домкасто ёвтнеме тесэ а карман. Пелян. Сон вельть домка, арась смусть амолямс эйстэнзэ верьга-ланга. Ёвтан ансяк лангакстонть: сонзэ теизе Павел Алёшин артыцясь, кона допрок аволь умок тейнесь невтема-выставка Саранск ошсо ды кармась улеме тенек вадря оякс.

Ней паро мельсэ ёвтан зярыя валт чокшнеденть.Малав весе, кить тердезельть, састь. Те корты седе: Людмила Рябовань шкинемазо явовты ломантнень мелест, сынь бажить марямс сонзэ валморотнень. Вана сон ушодызе чокшненть. Ёвтась сюкпря сыцятненень, ловнось валморо, кона алтазь ялгаксчинтень. Сон сёрмадозель минек лемс –«ВАЛонтень». Ламотне эйстэнек тесэть: Юлия Мамаева, Алёна Маторкина, Татьяна Маторкина, Татьяна Мокшанова, Алеся Клементьева, Марина Слугина, Наталия Козлова, Александр Данильчев. Весе минь анокстынек валморот. Ды ловномодост икеле эрьвась ёвтась сёрмадыцянть лемс паронь арсемань седейшкавань валт. Гайгсть Людмила Рябовань валморонзо лангс сёрмадозь Олёшонь моронзояк. Ушодкстонть мейле уш сась Андрей Бочканов, морась кавто морот, а ёвтави кода кецявтынзе весень! Сайнесть вал «Сятконь» прявт редакторось Т.В. Разгуляева, Калаганонь Керяз, кона казсь Люданень книга лангсо аштиця чувтосто керсезь покш пря корш, Р.В. Водясова, кона истя парсте ды вечкезь яла васты минек Йовлань Олонь этно-кудосо, Р.Д. Жегалина, кона свал бажи сакшномс тенек, улемс ютксонок, Маризь Кемаль, кона ловнось «Сяткосто» Людмила Рябовань валморонзо, макссь покш питне сонзэ шкинемантень ды «ВАЛонь» важодемантень, Нуянь Видяз, конань седеезэ кенярды, зярдо сон неи эрзянь од ломантнень вейсэ ды лезэв тевень теемстэ. Весе кортасть вадрясто, лембестэ, превейстэ ды паронь арсезь. Секс истя вадряль оймесэнть, секс истямо питнеель те вастовомась. Сюкпря Людмила Рябованень од пусмонть кис, тейсь миненек а ёвтави кодамо казне. Ды оштё вейке казнезэ ули минек раськентень: сон мирдензэ марто касты тейтерест, Софьянь, кельдензэ ды раськедензэ а виздицякс. Улезэ истя икелепелевгак!

Римма Жегалина ёвтызе мелензэ:

«Теке ванькс лембе коштто лексинь тынк марто улемстэ! Ванькс, мазый превей, домка смустев тиринь кельсэ Людмилань валмородонзо оймем пешкедсь!!! Покштояк покш мельспаросан пек сэрей тёкшонь эрзянь ПОЭЗИЯНТЬ марто вастомадонть!»

Чокшнень прядомсто Людмила Рябова ёвтась весинень сюкпря:

«Ялгат! Сюкпря весе паро валтнэнь кисэ, конат те чокшнестэнть ёвтазельть монь лемс! Ансяк те вастовомась аволь уле истямо валдокс монь вечкевикс ВАЛтомонть! Эрьвась, кие течи сакшнось юткозонок, кандсь миненек оймень валдо, лембе толнэ, кона лезды тенек седе товгак молемс икелев ды верьга кандомс эрзянь валонть ды эрзя лементь!»


Невтевкст править


Лисьмапрят править

Оригинальный репортаж
Эту статью написал Андрей Петров (Erzianj jurnalist) специально для Русских Викиновостей. Она содержит ранее не публиковавшиеся материалы или исследования, источником которых является сам автор. Статью проверил и опубликовал редактор Александр Красоткин (Krassotkin). Вы можете свободно без согласования и выплаты вознаграждения копировать, распространять и изменять эту статью в любых целях, включая коммерческие, однако вы обязаны указать автора, источник и лицензию. Например, так: Андрей Петров, Александр Красоткин; Викиновости; CC BY 2.5. Вы также должны обозначить изменения, если таковые были сделаны. Лицензии изображений уточняйте на их страницах на Викискладе.

Комментарии

Викиновости и Wikimedia Foundation не несут ответственности за любые материалы и точки зрения, находящиеся на странице и в разделе комментариев.