Эрзянь литературань «Вал» кужонтень топодсь вете иеть
21 апреля 2018 года
2018 иень чадыковонь 12 чистэ Саран ошсо ютась «Вал» литературань кужонть ветеинь покш чинть ютавтомась. Ки а соды: «ВАЛ» куронть ундокскензэ туить 2013-це иентень, зярдо «Сюлгамо» арт-салонсо А. И. Луценко пурнакшнынзе эрзянь од сёрмадыцятнень филологиянь факультетэнь студенттнэнь марто вастовомас. Неть од сёрмадыцятне ульнесть вана кить: М. Ерёмина, Е.Биушкина, И.Астайкина, В.Картышкин, Л.Рябова, А. Подгорнова, Н. Карпов. Вастовомась алтазель Поэзиянь чинтень. Ютась лембестэ-оймевстэ, студенттнэ эзть удо (те эно паряк ней истя маряви), кортамось мольсь валанясто. Чаесь псиль. Лимон марто прякась тантеель. Аштинек минь, од сёрмадыцятне, оймсинек вастовомадонть мейле, кортнинек Анна Ивановнань марто, ды вана кие-бути мерсь: мекс миненек а вастневемс вана истя седе сеедьстэ? Аволь кодамояк покш чистэ, истяко, тувталтомо. Кие ульнесь ёвтыцясь? Кодаяк а ледстяви: Лена Биушкина эли Инна Астайкина? Кие-бути эйстэст. Чарькодеви, весень мельс те тусь. Од сёрмадыцянь семинартнэ, конатнень ютневти Сёрмадыцянь вейсэндявксось, лоткасть тенек сатномодо. Видеяк, мезе те истямось: кавксть иезэнзэ пурнакшновомс? Ды те икеле ульнесь кавксть, ней уш натой весть… Нурькинестэ меремс, алтынек пурнакшновомс седе сеедьстэ. Мейле тукшнынек кудова. Аволь весе. Ледстяви, Миколь Карпов капшась филармонияв. Лангсонзоль якстере куртка, эйсэнзэ сон неявсь танзеекс эйзюрковонь шержей пертьпелькссэнть. Миколь сестэ морась морот, конатнень ладсинзе А. В. Араповонь стихензэ лангс.
Чарькодеви, омбоце чистэнть, таргонь трокс ды ковонь ютазьгак кияк эзь пурнаво. Эрьванть салызе-потизе эсь эрямозо. Те малав свал истя эрси. Ялатеке пурнакшновомадо мелесь кеместэ «озась» прятнес. Лети понгомс вейсэ кодамояк покш чистэ — кияк ды ледстясы. Ды истя, шкань ютазь, минь карминек вастневеме «Сятко» журналонь сехте покш нупальсэнть.
Ней уш вастневтяно вете иень перть. Арсинкая, вете иеть! Кона шкане сынь ютасть, мон а содан. Чарькодян ансяк вейкенть: а улиндеряволь «ВАЛонок», вейсэнь тевенек-бажамонок, те шкас умок сралевлинек эрьвась эсенек ужинева.
Вереськак истя а сюлми, кода вейсэнь тевесь. Кадык минь вастневтяно аволь пек сеедьстэ, ялатеке содатано: пурнавтано, ёвтнесынек тевенек-мелявксонок, кенярксонок-кажонок, седейшкава кортатано, ракатано, ловносынек сёрмадовксонок, — ды оймесь пешкеди вийде, конат лездыть эрямс сы вастовоманть видьс.
Зярошка кенярксонок ульнесь, зярдо 2013-це иестэ васенцеде лисинек «ломань юткс»! Тердинек инжеть ды меринек: шумбрачи, минь ультяно! Теде мейле ютавтозельть лия вастовомат, ломантне тонадсть эйзэст ды эйзэнек, кармасть кевкстнеме, зярдо таго несамизь. А кемевияк: таго-зярдо ульнесь лиякс. Маряви, «ВАЛсонть» минь потомдынек кодамо-бути чаво тарка. Ды те, секень вант, аволь ансяк зэрниця пафос. Минь вантано вейкенек-вейкенек лангс, пелькстатано: вана Юля Мамаева, меремс, сёрмадсь максозь теманть коряс валморо, а мон эзинь! Ужока, озан! Сехте стакась — озамс. Кармавтомс прянть важодеме, кедтнень — сёрмадомо. Лиясто эстеть а кармавтови, сестэ теть лездыть ялгат. Каня те берянь?
Чарькодеви, те лирика. Ды «Контактсо» истят кувака сёрмадовкстнэ а ловновить. Ялатеке а жалятадызь, ялгат, сёрмадса седеяк кувакасто! Арсинек-арсинек, кода ютавтомс тенек 5 иень тешкстамонть? Сынек мельс: седе вадря ули теемс весементь шожда, пейдемань лувсо. Тердтяно сцена лангс инже — мизолдовозо. Валмороткак кочкинек истят, пейдевтевельть ды теке шкане кармавтовольть арсеме. Келя, тевенек лиссь, весемесь ютась парсте. Кодашка мельспаросо кунсолынек вечкевикс ялганок — Калаганонь Керяз лелянть, конанень Этнокудов теке эстенек кудов сакшнотано; Ледяйкин Евгениень, кона свал арси мезеяк од, яла ёвты тенек питней мельть; Маризь Кемалень, кона моли од сёрмадыцятнень марто велув, свал максни питней превс путомат, сакшны мартонок вастовомо; Йовлань Оло лемсэ морамо куронть, кона морамосонзо весе ёжопонанок стявтынзе (илядо арсе мезеяк берянь); Андрей Бочкановонь, кона пицькавтомо кирвазтьсы куш кинь (натой лисиксэлинь киштеме, эль кирдевинь Зинёронь Сантяйнень); Максим Рябовонь, конань моронь ладсемань ёрокчинзэ панжинек эстенек тунь а умок. Весе, кить лиснесть сценанть лангс эли аштесть залсо, кунсолость минек — те ялганок. Ламот ялгадонок эзть саво. Ялатеке паро валост ёвтызь сёрмасо, видеосо. Берянь, мекс шканок эзь сато весе сынст невтемс, путсынек тей, несызь седеяк ламот!
Мезекс мон весементь тень сёрмадыя? Вейкень кис: ёвтамс сюкпря. «ВАЛонь» эрьва пелькскентень — «морфемантень», бути лади истя меремс. Минек учить покш тевть, покш стакачить. Кеман, ютксост кармить улеме кенярксткак. Кинь-бути марто эрямось, нама, явсамизь, кинь-бути марто — вейсэндясамизь. Минь ютатано ламо янт. Ков сынь пачтясамизь — икелепелев а ёвтави. Ёвтави вейкесь: зярс минь кирдевтяно вейсэ. Кода машттано. Ды мон весень вечктядызь. Кода яла мереви Калаганонь Керяз лелясь, катастрофа, кода вечктядызь!
-
Рябова Людмила, «ВАЛ» курос совиця, валморонь сёрмадыця, «Сятко» ковставксонть прявт редакторонть полавтыця. Слугина Марина, «ВАЛ» курос совиця, эрзянь келень тонавтыця. -
Бочканов Андрей, валморонь ды седийень сёрмадыця, морыця. -
Маризь Кемаль, валморозей, сёрмадыця. -
Карпов Николай, «ВАЛ» курос совиця, валморонь, моронь сёрмадыця, важоди школасо. -
Калаганонь Керяз, Россиянь артындеень Кужос совиця, «Эрьмезь» Вирь Тавлань чувтосто керсицянь Вейсэндявксонь прявт. -
Маторкина Алёна, «ВАЛ» курос совиця, тонавтни Н. П. Огарев лемсэ университетэнь филологиянь факультетэнь магистратурасо. -
Ледяйкин Евгений, НКО «Эрзянь вайгель» (Москов ош) прявось. -
Антонов Ю.Г. Н.П.Огарев лемсэ университетэнь филологиянь факультетэнь финнэнь-угрань литературатнень кафедрань прявт, филологиянь наукань доктор, доцент. -
Рябов Максим, «Эрьмезь» вейсэндявксонь керсиця, эрзянь моронь сермадыця. -
Виталий Картышкин, «ВАЛ» курос совиця, сёрмадыця, важоди школасо.
Источники править
Комментарии
Если вы хотите сообщить о проблеме в статье (например, фактическая ошибка и т. д.), пожалуйста, используйте обычную страницу обсуждения.
Комментарии на этой странице могут не соответствовать политике нейтральной точки зрения, однако, пожалуйста, придерживайтесь темы и попытайтесь избежать брани, оскорбительных или подстрекательных комментариев. Попробуйте написать такие комментарии, которые заставят задуматься, будут проницательными или спорными. Цивилизованная дискуссия и вежливый спор делают страницу комментариев дружелюбным местом. Пожалуйста, подумайте об этом.
Несколько советов по оформлению реплик:
- Новые темы начинайте, пожалуйста, снизу.
- Используйте символ звёздочки «*» в начале строки для начала новой темы. Далее пишите свой текст.
- Для ответа в начале строки укажите на одну звёздочку больше, чем в предыдущей реплике.
- Пожалуйста, подписывайте все свои сообщения, используя четыре тильды (~~~~). При предварительном просмотре и сохранении они будут автоматически заменены на ваше имя и дату.
Обращаем ваше внимание, что комментарии не предназначены для размещения ссылок на внешние ресурсы не по теме статьи, которые могут быть удалены или скрыты любым участником. Тем не менее, на странице комментариев вы можете сообщить о статьях в СМИ, которые ссылаются на эту заметку, а также о её обсуждении на сторонних ресурсах.
